गजल : मोती बटुलेको कुरा गर ।

आजैको भेटमा संधै भन्न भुलेको कुरा गर ।
तोरीबारी झैं पँहेलिएर फूलेको कुरा गर । १

पर पर फैलिएका ति गहुँका खेतहरुमा ,
बसन्ती हावा संगै रमाई डुलेको कुरा गर । २

कुहु कुहु कोईलीले मिठो गीत गाईरहँदा ,
हात समाई फाँटहरुमा डुलेको कुरा गर । ३

गर्मीको मौसम खोलाको त्यो पानी चिसो पिउंदै ,
बगरमा मायाको मोती बटुलेको कुरा गर । ४

यै छातीलाई सिरान हाली पैयुँको बुट्टामुनि ,
तिम्रै परी हुँ म भनेर पुल्पुलेको कुरा गर । ५

मिठो लाग्छ भने अतित टहटह जुनेलीमा ,
चन्द्रमा संग लाज नमानी खुलेको कुरा गर । ६

बिर्षिएर मिठो सबै तितो मात्र बाँकी छ भने ,
निर्धक्क भै यो छातीमा आँधी हुलेको कुरा गर । ७

यो भेटलाई फेरी अर्को शुरुवात बनाउन ,
हामी बिच तितो मिठो सबै सुलेको कुरा गर । ८