गजल : तिम्रो नायक हुन नसक्दा

पछुतो थोर बहुत् बाँकी छ तिम्रो नायक हुन नसक्दा ।
प्रेमको के कुरा भो र नजरमै लायक हुन नसक्दा ।

नलेखेको हैन सयौं गीतमा तिमीलाई रचेर मैले ,
पाएनन् अर्थ मेरा शब्दहरुले गायक हुन नसक्दा ।

दुरी भुगोलको हिसाब नगरी भ्रम सँधै बाँचिएछ ,
सकेन मौलाउन हाम्रो प्रेमले पायक हुन नसक्दा ।

न हात नै मिल्यो समाउन खोज्दा साथ पनि टाढा टाढा ,
भयो कि यो सब एक अर्काको सहायक हुन नसक्दा ।

आफ्नो निमित्त त के कुरा भो र आज तिम्रै निमित्त पनि ,
सकिनछु आवाज उठाउन विधायक हुन नसक्दा ।

जलाएर मात्रै कहाँ हुँदोरहेछ र 'दीपक' मनमा ,
छरेर उज्यालो त्यो 'दीपक' सुखदायक हुन नसक्दा ।

मिती याद गरेको छैन मैले तर निक्कै भयो मैले गजल लेखेको छैन । पछिल्लो पटक मैले ' नियम बनाउँ भन्छन ' भन्ने गजल लेखेको थिएँ । आज पुराना ड्राफ्टहरु हेर्दै जाँदा ( ब्लगका ) मैले निक्कै अगाडी लेखेको गजल भेटेँ जुन चार शेर पहिले नै तयारी अवस्थामा थियो भने दुई थप शेरहरु आज पुरा गरेर तपाईँहरु समक्ष ल्याएको छु । म गजल नलेखि रहेको अवस्थामै हुँदा यो गजललाई पुरा गरेको हुँ तर आज यस्तो महसुस भै रहेछ कि म आजैबाट गजल नलेखिरहेको अवस्थालाई तोड्दैछु । वास्तवमै मैले केहि समयलाई गजलबाट टाढै रहने विचार गरेको थिएँ तर आज एक्कासी पुरानो गजललाई पुरा गर्ने निहुँ बनाएर लेखीछाडें । हेरौ अगाडी म गजलमा फर्कन पनि सक्छु ।